Boiro cidadán

O Faiado

Chegados son os tempos de preservar as pegadas de noso pasado; tempos de conservar un futuro mellor. Para iso, contamos coa forza da ilusión e das ideas asentadas; debuxamos proxectos de dinamización e sensibilización; aglutinamos persoas e sensibilidades varias; organizamos foros de concienciación, e, por último, reclamamos medidas efectivas aos poderes establecidos.

Unha sociedade sen fonda raizame verase, indefectiblemente, arrastrada polo xélido vento da desmemoria. Nosoutros, membros e simpatizantes do Faiado, sabémolo ben. Por iso, nada do que foi nos é alleo. A nosa loita é contra o efémero e perecedoiro, con vocación de eternidades. Loitamos contra a ferruxe desdebuxada do solpor, a prol do abrente da lembranza. Pelexamos por todo o que os nosos devanceiros crearon con amor e afán de trascendencia. somos ponte tendida entre o esquecemento e a esperanza. Estamos a esculcar na soidade clamorosa do pasado a fin de reanimarmos a forza seminal dos cervos en flor, e esa seiva nutricia das mámoas espidas, que foron modelando o noso horizonte cultural e as nosas querenzas.

Somos, pois, no Faiado-2, memoria rediviva. Sabémonos fillos privilexiados do Tempo, de imaxes espelladas ao longo dos moitos roteiros que salferen a comarca barbanzá, onde hórreos e pombais, castros e cruceiros, mámoas, brasóns e muíños tecen calzadas de pedra e salitre desde o Neolítico ao Faiado, pasando polo porto da Covasa e o castro de Neixón.